அரிசிமாவை வறுத்து
அதிலை தண்ணி சேர்த்து
திரட்டிக் கொஞ்சம் எடுத்து
பேணிச்சுண்டு கொண்டு
சுளகில் போட்டுக் குத்தி
பிடைச்சு அத பிரிச்சு
தேங்காய்ப்பூ கலந்து
நீத்துப்பெட்டி எடுத்து
அதில அத நிரப்பி
ஆவியிலை வைச்சு
மூடி போட்டு அவிச்சு
ஓலை பெட்டி எடுத்து
அதிலை அதை கொட்டி
மூலைப்புட்டை அள்ளி
வாயிலை போட்டுப் பாரு
காலை நேரம் உரலை
மெல்லக் கொஞ்சம் நிமித்தி
பொரிச்ச மிளகாய் போட்டு
வெங்காயம் சேர்த்து
பழப்புளியும் கலந்து
தேங்காய்ப்பூ போட்டு
இடிச்ச சம்பல் எடுத்து
அள்ளிப் புட்டை பிடிச்சு
கொஞ்சம் தின்று பாரு
கத்தரிக்காய் வெட்டி
உருளைக்கிழங்கு சேர்த்து
வெங்காயம் தூவி
ஆனைக்கோட்டை எண்ணை
அதிலை கொஞ்சம் விட்டு
நல்லாப் பொரிச்சு எடுத்து
புட்டில் கொஞ்சம் கலந்து
கையில் அள்ளிப் பிடிச்சு
கொஞ்சம் தின்று பாரு
ஊர் முட்டை எடுத்து
உப்பு மிளகு சேர்த்து
நாலு ஈர்க்குச் எடுத்து
நல்லா நுரைக்க அடிச்சு
பச்சை மிளகாய் வெட்டி
வெங்காயமும் அறுத்து
வதங்கலாக பொரிய
அடிச்ச முட்டை சேர்த்து
அதிலை புட்டை போட்டு
அள்ளித் தின்று பாரு
நண்டு நாலு எடுத்து
நல்லா வதக்கிப் பிரட்டி
ஊர்த் தூளும் போட்டு
உறைப்பாக் கறி வைச்சு
கூப்பன் மாவை அவிச்சு
அரிச்சு குழைச்சு அவிச்ச புட்டு
மேலை கொஞ்சம் ஊத்தி
குழைச்சு அடிச்சுப் போட்டு
மிச்சக் கறிச் சட்டி
அதிலை கொஞ்ச புட்டை
பிரட்டித் தின்று பாரு
முக்கனிகள் மூன்றில்
வாழைப்பழம் எடுத்து
தயிர் சீனி சேர்த்து
தளர்வாய் கொஞ்சம் பிசைந்து
கிள்ளித் தின்று பாரு
கறுத்தக் கொழும்பான் சீவி
அரிசிமாவு புட்டை
அதிலை கொஞ்சம் கொட்டி
பிசைந்து தின்னு பாரு
கீரைப்புட்டு
ஒடியல்புட்டு
உழுத்தம்புட்டு
பாற்புட்டு
இன்னும் பல இருக்கு
நேரம் கொஞ்சம் மட்டு
அதனாலை போட்டு
வாறன் பிறகு
புட்டு பற்றி இன்னும்
புட்டுப் புட்டு வைப்பேன்
#ஈழத்துப்பித்தன்
No comments:
Post a Comment
தேடி வந்தோரே தங்கள் கருத்துக்களையும் நாடி நிற்கின்றேன்.