Pages

July 10, 2022

நயப்புரை - "சிவபுரத்தரசே சிவபெருமானே"



 நேற்று (09.07.2022) சூரிச் சிவன் கோவில் சைவத் தமிழ்ச் சங்கம் நடாத்திய "சிவபுரத்தரசே சிவபெருமானே" எனும் இசை வெளியீட்டு நிகழ்வில் நயப்புரை ஆற்றும் வாய்ப்பினை சைவத் தமிழ்ச் சங்கமும் கவிஞர் வேலணையூர் சுரேஸ் அவர்களும் வழங்கியிருந்தார்கள். 

கவிஞர் வேலணையூர் சுரேஷ் அவர்களிடம் "அண்ணா மீண்டும் பெரும் பொறுப்பை தந்துள்ளீர்களே" என்ற பொழுது அவர் சொன்ன "இது அ( சி)வனின் அழைப்பு" ஒற்றை வரி நம்பிக்கையை தந்தது. அந்த நம்பிக்கையோடு ஏற்றுக்கொண்டேன். அந்த நிகழ்வு பல நன்மைகளைத் தந்தது.

நயப்புரை

*********

மூத்த குடியின் முதன்மொழி மகளே!

ஆதி முகாந்திரமாய் தோன்றிய முகிதல் இல்லாத முத்துக் குளிக்கும் கடலே என் தமிழ்த் திருவே உன் மலரடிக்கே என் முதல் வணக்கம்.

சீர் மேவும் இணுவை சிவகாமி மைந்தன்

கார் எட்டும் பெருமஞ்ச நாயகன் சோதரன்

பார்  புகழும் இணுவை பர்ராசசேகரன் பதம் பணிந்து, சூரிச்சில் உறைகின்ற சுந்தரன் தாழ் பணிகின்றேன்.

அவன் அருளால் அவன்தாழ் வணங்கி அந்தணப்பெருமக்களுக்கும் ஐயனின் அடியவர்களுக்கும் என் தமிழால் அவன் புகழ் பாடி அரங்கேற்றி நிற்கும் கவிஞர் பெருமக்களுக்கும்  நுண் இசையால் சுவையூட்டிய இசையமைப்பாளர்களுக்கும் தம் குரலால் உயிர்கொடுத்து பாடி உரமேற்றிய பாடகர் குழாமிற்கும் சிவன் ஆலய நிர்வாகத்தினருக்கும் சைவத் தமிழ்ச் சங்கத்தினருக்கும் வணக்கம். 

சைவத் தமிழ்ச் சங்கம் மீண்டும் ஒரு தடவை குருவி தலையில் பனங்காயை ஏற்றி வைத்திருக்கின்றது. அதனைச் சுமக்கின்ற அடித்தளத்தையும் அவர்களே தந்ததாலும் அவன் அருளால் இந்தச் சந்தர்ப்பம் அமைந்ததாலும் அந்த துணிவோடு களம் இறங்குகிறேன்.

மிகச் சிறுவயதில் புலம்பெயர்ந்து வந்த நான் உட்பட இன்று வரை இங்கு பிறந்து வளர்ந்து கொண்டிருக்கும் தமிழ்க் குழந்தைகள் ஏன் இந்த இசைப்பேழையில் பாடியிருக்க கூடிய அத்தனை பிள்ளைகளின் தாய்மொழி மற்றும் கலை வளர்ச்சியில் இந்த சூரிச் சிவன் ஆலயமும் சைவத் தமிழ்ச் சங்கமுமே அடிக்கற்களாக உள்ளது என்றால் மிகையாகாது. 

இன்று சுவிற்சர்லாந்தில் நாடளாவியரீதியில் இயங்கும் தமிழ்ப் பள்ளிகள் முதல் நாடளாவியரீதியில் நடைபெறும் பொதுத்தேர்வு வரை சைவத் தமிழ்ச் சங்கத்தால்தான் அறிமுகப்படுத்தி ஆரம்பித்து வைக்கப்பட்டது. 

தாய்மொழித் தேர்வு, திருக்குறள் மனனப் போட்டி, பேச்சுப் போட்டி, நாடகப்போட்டி என என் திறன்களை காட்ட களம் தந்து எனை வளர்த்து இந்தச் சமூகத்துக்கு என்னை அறிமுகப்படுத்திய இந்தக் கூடம் தற்போது என் அடுத்த கட்ட வளர்ச்சிக்கும் களம் தந்து நிற்கின்றது. அந்த நன்றி உணர்வோடு தொடர்கின்றேன்.

தவறுகள் இருப்பின் தமிழால் பொறுத் தருள்க.

இறைவனை பாடுதல் என்பது இன்று நேற்று ஆரம்பமானதல்ல. தமிழை அதன் சுவையை அதன் இலக்கண இலக்கிய தரங்களை வளர்த்த பெருமை தொன்று தொட்டே பக்தி இலக்கியங்களுக்கு உண்டு.  

ஈழத்து புலவர்களாலும் பல பக்தி இலக்கியங்கள் படைக்க கூடிய சூழல் உருவாகி அங்கொன்றும் இங்கொன்றுமாய் படைக்கத் தொடங்கிய காலத்தில் எங்கள் தேசத்தில் நிலவிய இன ஒடுக்குமுறையும் அதற்கெதிரான கிளர்வும் மண் மீட்பு போராக உருக்கொண்டு எம் தேசம் மீது கருமேகம் சூழ்ந்தது.  போர்ச்சூழல் புரவலர்களை பரணி பாட அழைப்பு விடுத்தது. எங்கள் தேசத்தின் வலியும் போரும் வெற்றியும் கருவாகி உருவாகின.

2009இல் எங்கள் வாழ்வும் வளங்களும் புரட்டிப்போடப்பட இயலாமையாலும் அச்சத்தாலும் எங்கள் படைப்பாளிகளின் குரல்களும் படைப்புக்களும் சுருங்கிப் போயின. 

 தன் உள உணர்வுகளை வடித்துக் கொட்ட வடிகால் தேடிக் கொண்டிருந்த பொழுதினில் மனம் முழுதும் நிறைந்த இயலாமையும் வெப்பியாரமும் ஏக்கமும் வடிகால் தேடி இறைவனை எம் மீட்பனாக கருதி தங்கள் வலிகளைச் சொல்லி  பாட அவை இறையருட் பாட்களாக மலரத் தொடங்கின.

அந்த வகையிலே அன்று முதல் இன்று வரை மக்களின் வலிகளை உணர்ந்து சிவபுரத்தின் அரசாக படியளந்துகொண்டிருக்கும் சூரிச்பதி உறை சுந்தரேசன் மீது தொடர்ச்சியாக பல பாடல்கள் வந்து கொண்டிருக்கின்றன. இன்று முத்தாரமாய் இரண்டு இசையமைப்பாளர்கள் இசை மீட்டி 12 கவிஞர்கள் பாடல் யார்த்து 19 பாடகர்கள் பாடி 16 பாடல்களுடன் வெளி வந்திருக்கின்ற "சிவபுரத்தரசே சிவபெருமானே" என்ற இந்த இசைப்பேழையின் இசை வெளியீடு ஒரு காலத்தின் பதிவாக சிறப்புப் பெறுகின்றது.

சுந்தரர் சம்பந்தர் பாடிய திருக்கோணேச்சரம் திருக்கேதீச்சரம் போல் எங்கள் புதுவையரால் பாடல் பெற்ற தலம் எனும் பெருமை மிகு சிவனாரை இன்று இத்தனை பேர் இணைந்து பாடியிருப்பது பெரும் சிறப்பாகும்.

பாடல்களுக்குள் நுழைய முன்னர் பாடல்களில் இருக்க வேண்டிய கவனிக்க வேண்டிய சில விடயங்களை குறிப்பிட்டுச் செல்லலாம் என நினைக்கின்றேன்.

ஒவ்வொரு படைப்பும் அந்த காலத்தை அந்தக் காலத்தில் வாழும் மனிதர்களின் உள உணர்வை, எதிர்பார்ப்பை, சூழலையும் பதிவாக்கி காலங்கள் கடந்தும் கடத்தும் வல்லமையை கொண்டனவாக உருவாக்கப்படுதல் வேண்டும். 

இன்று தேவாரங்களை வைத்து திருக்கோணேச்ரம் திருக்கேதீச்சம் பற்றி நாம் அளவிடுவதைப் போலவும் அந்தக் காலத்தை உணர்தலைப் போலவும் இருத்தல் இருத்தல் வேண்டும். அத்தகைய படைப்புக்களே காலங்கள் கடந்தும் நிலைபெறும். 

இவை பற்றி இன்னும் ஆழமாகப் பேசலாம். உங்கள் நேரத்தை நான் அதிகம் திருடிக்கொள்ள விரும்பவில்லை.

உள்ளே என்ன உள்ளது என பார்க்க வேண்டும் என்ற ஈர்ப்பை ஏற்படுத்துகின்ற அழகிய வடிவமைப்புடன் கூடிய இந்த இசைப் பேழை இசையமுதனின் முகவுரையுடன் விரிகின்றது.

இரு பக்கமும் மின்னொளி அலங்காரங்கள் ஒளி சுடர நடுவே செங்கம்பளம் விரிந்திருக்க வானவேடிக்கை முழங்க கரங்களை பிடித்து விழா மண்டபத்தினுள் அழைத்துச் செல்லும் உணர்வினை இசையமுதனின் முகவுரை தந்து பாடல்களை கேட்கும் மன நிலைக்கு எம்மை தயாராக்கி அழைத்துச் செல்கின்றது.

பதினாறு பாடல்களையும் கேட்டு முடித்த பொழுது கை நிறைந்து தேன் வழிந்து ஒழிகிடும் பஞ்சாமிர்தத்தை உண்டது போல் மனம் இனித்துக் கிடந்தது.

முதலாவது பாடலாக கவிஞர் இன்பம் அருளையாவின் வரிகளில் முகிலரசனின் இசையில் ஜனாவின் குரலில் உருவான முதற் பிள்ளை கணபதிக்கு என்ற பிள்ளையார் பாடல் பிள்ளையார் சுழி்போட்டு நல்லதை தொடங்கிவிடு என்ற பாடலுக்கு நிகரான இசையில் மனதோடு இணைந்துகொண்டது. 

முகிலரசனின் இசையில் 14 பாடல்கள் இசையமைக்கப்படுள்ளன அவை ஒன்றுக்கு ஒன்று சளைத்தவை அல்ல அத்தனை பாடல்களும் உணர்வோடு கலந்து சாமகானம் இசைத்தன.

இந்த பாடலை எழுதியிருக்கும்  கவிஞர் இன்பம் அருளையா அவர்கள்  இந்த இசைப்பேழையில் மொத்தம் நான்கு பாடல்கள் உள்ளன. இவரைப் பற்றி சொல்வதாயின் இன்று சுவிற்சர்லாந்தில் வாழும் கவிஞர்கள் மத்தியில் அதிக பாடல்களை புனைந்திருக்கும்  கவிஞர்  என்ற பெருமை இவருக்குண்டு. 

ஜனாவினுடை காந்தக்குரல் மீண்டும் கேட்கத் தூண்டுகின்றது.

இரண்டாவது பாடல் "மனமொழி மெய்ப்பால்" கவிஞர் வேலணையூர் சுரேஸ் அவர்களின் வரிகளில் ஆரபி திருநாமசிங்கம் அவர்களின் குரலில் இடம்பெற்றிருக்கின்றது.   கவிஞர் வேலணையூர் சுரேஸ் பற்றி சொல்லத் தேவையில்லை. அனைத்தையும் காப்பாற்று எம் இனத்தையும் காப்பாற்று என எங்கள் எதிர்பார்ப்பை சொல்லிச் செல்கின்றது. ஆரபியின் குரலில் நல்ல முதிர்ச்சி தெரிகின்றது. வருடிப் போகின்றது. 

மூன்றாவது பாடல் "உந்தன் பாதம் தஞ்சமென்று வந்தடைந்தோம் பரமனே" கவிஞர் மணிமொழியின் வரிகளில் அஜித்தா விஜயகுமார் பாடியிருக்கின்றார். 

இனி நீதான் எல்லாமே என அவன் பாதம் பணிந்து உருகின்ற வரிகள் மனதை பிசைந்து போகின்றது. சிறந்த பாடகியாக எங்கள் மனங்களில் பதிந்த மணிமொழி சிறந்த பாடலாசிரியை எனவும் நிரூபித்த பாடல் இது. அஜித்தாவின் குரல் எனக்கு மிகவும் பரீட்சயமான குரல். மனதோடு உறவாடிப் போகின்றது.

நான்காவது பாடலாக "காரிய காரணனே" கவிஞர். கு. வீரா அவர்களின் வரியில் வசீகரன் அவர்களின் இசையில் செல்லப்பா ஶ்ரீகந்தவேள் அவர்களின் குரலில் இன்றைய கால வலிகளை சொல்லும் பாடலாக அமைந்துள்ளது. கவிஞர் வீராவின் கவித்துவம் பற்றி சொல்லத் தேவையில்லை.

இசையமைப்பாளர் வசீகரன் இந்த இசைப்பேழையில் இரு பாடல்களுக்கு இசையமைத்துள்ளார். இரு பாடல்களும் வரிகளின் ஆழத்தை வெளிக்கொண்டு வந்திருக்கின்றன. 

ஐந்தாவது பாடலாக "ஆதியும் நீயே அந்தமும் நீயே" கவிஞர் இன்பம் அருளையாவின் வரிகளில் சாரங்கா வரதராஜனின் குரலில் அமைந்துள்ளது. விறுவிறுப்பாக அமைந்த இந்த பாடலில் பஞ்சபூதங்களை கட்டி ஆளும் சிவனின் அற்புதங்களையும் புலம்பெயர்வின் வலியையும் பேசும் வகையில் அமைந்துள்ளது. சாரங்கா வரதராஜன் இன்றைக்கு பத்து ஆண்டுகளுக்கு முன்னரே நாம் கரம் பிடித்து மேடைகளில் ஏற்றிய சிறுமி. இன்று அற்புதமான மிளிர்ந்து பாடகியாக தன் குரலால் உயிர்கொடுத்துள்ளாள். 

ஆறாவது பாடலாக "அன்பே சிவமென்று" அகரப்பாவலனின் வரிகளில் மாதுமை மகேந்திரராஜாவின் குரலில் வெளிவந்துள்ளது.

அகரப்பாவலனின் வரிகள் மனதுக்கு பேரின்பத்தை தந்து போகின்றது. மாதுமையின் குரல் இனிக்கின்றது. மாதுமையின் குரலில் ஏன்கனவே கடந்த ஆண்டு ஒரு பாடலை கேட்டிருந்தேன். அதனிலிருந்து இந்தப்பாடலில் அனுபவ முதிர்ச்சி தெரிகின்றது.

ஏழாவது பாடலாக "ஆதி சிவபெருமானே"  மயிலையூர் இந்திரனின் வரிகளில் ஜீவனின் குரலில் உள்ளத்துள் ஊடுருவுகின்றது. "ஊரிழந்து உறவிளந்து படும் வலிகளை சிவனிடம் சொல்லி உருகும் இப்பாடலில் மூலம் சிறந்த படகராக எம் மத்தியில் நீண்டகாலமாக அறிமுகமான இந்திரன் தான் சிறந்த காலக் கவிஞன் என்பதை நிரூபித்துள்ளார். ஜீவனின் குரல் மனதைப் பிசைந்து வருடுகின்றது. 

எட்டாவது பாடலாக " அருணாச்சலனே" ஈழப்பிரியனின் வரிகளில் பிரியா முரளீஸ்வரனின் குரலில் இடம் பிடித்திருக்கின்றது. சந்தம் சிந்தும் ஈழப்பிரியனின் வரிகளுக்கு பிரியா இனிதாக உயிர் கொடுத்துள்ளார். 

கவிஞர் ஈழப்பிரியனின் கவித்துவம் பற்றி கடந்த ஏழு ஆண்டுகளுக்கும் முன்னதாகவே இனங்கண்டு பாராட்டியிருந்தேன். பிரியாவின் பாடும் திறனை கடந்த 25 ஆண்டுகளுக்கு முன்னரே பாசல் சங்கமம்  இசைக்குழுவின் மேடைகளில் கேட்டிருக்கிறேன். இங்கும் மிளிர்ந்திருக்கிறார்.

ஒன்பதாவது பாடலாக "அன்பே சிவமாய் அமர்ந்த நாதனே" கவிஞர் இன்பம் அருளையா அவர்களின் வரிகளில் திருமால் ஆர்த்திகன் டினுஜா முகிலரசன் பாடியிருக்கின்றார்கள். மழலைத் தமிழில் சிவன் நாமம் சிறந்திருந்தது.

பத்தாவது பாடலாக "சோதியே சுடரே" கவிஞர் நிர்மலாதேவி பரராஜசேகரம் அவர்களின் வரியில் பிரதீபா இராதாகிருஷ்ணனின் குரலில் இடம்பெற்றுள்ளது. 

பாரா முகமாய் உள்ள பாம்பணிந்த ஈசனை பாடித் தொழும் இப்பாடலின் கவித்துவம் தனித்துவமானது. கவிஞர் நிர்மலாதேவி சுவிற்சர்லாந்தில் பக்தி இலக்கியத்துக்கு வித்திட்ட கவிஞர்களில் முதன்மையானவர். பிரதீபா கவிஞரின் உணர்வை சிறப்பாக வெளிப்படுத்தியுள்ளார்.

பதினொராவது பாடலாக பக்தருக்கு அருள் செய்வாய் கவிஞர் விவேகானந்தன் அவர்களின் வரிகளில் அபூர்வா செல்வச்சந்திரனின் குரலில் இடம்பெற்றுள்ளது. மிகுந்த ஆர்வத்தோடு கவிபுனையும் கவிஞர் விவேகானந்தனின் வளர்ச்சியின் மைல் கல்லாக இப்பாடல் அமைந்துள்ளது. ஆபூர்வாவின் மழலைத் தமிழ் எம்மையும் ஈர்த்துப் போகின்றது.

பன்னிரண்டாவது பாடலாக எத்திசையில் நான் கவிஞர் வெற்றி துஸ்யந்தனின் வரிகளில் ஆரூரன், அதிசயா திருநாமசிங்கம் பாடியுள்ளார்கள். எம் பிரானை நினைந்து உருகும் கவிஞரின் பாடல்வரிகள் எம்மையும் உருக்குகின்றது. ஆரூரன், அதிசயா இருவரின் குரல்களிலும் நல்ல முதிர்ச்சி தென்படுகின்றது. 

பதின்மூன்றாவது பாடலாக அப்பன் பரமேஸ்வரன் கவிஞர் இன்பம் அருளையா வரிகளில் வசீகரனின் இசையில் விஜிதா இலங்கேஸ்வரன் பாடியுள்ளார். சூரிச் சிவன் கோவிலில் உறைகின்ற கந்தனை பாடியுள்ள கவிஞரின் வரிகள் விஜிதாவின் குரலில் வருடுகின்றது.

பதின்நான்காவது பாடலாக காளியே சூலியே அகரப்பாவலனின் வரிகளில் அக்சயா இராதா கிருஸ்ணனின் குரலில் துள்ளலாக அமைந்துள்ளது. காவடிக்கு ஏற்ற பாடலாக சிறக்கிறது. 

பதினைந்தாவது பாடலாக அன்பே சிவமென்போம் கவிஞர் மூத்த படைப்பாளி ஆதிலட்சுமி சிவகுமார் அவர்களின் வரிகளில் பெரியவர் சாம்பசிவம் அவர்களின் குரலில் ஓர் தத்துவப்பாடலை ஒத்து அமைந்திருந்தது. கவிஞர் ஆதிலட்சுமி அவர்கள் பற்றி சொல்வதாயின் எனது வயதையும் விட அவரது படைப்புலக அனுபவம் நீண்டது. பல படைப்புக்களை நூறு படைப்புக்களை வெளிக்கொண்டு வந்த ஒரு ஆளுமை.

ஐயா சாம்பசிவம் அவர்களின் குரலில் பாடல் உணர்வோடு கலக்கின்றது.

பதினாறாவது பாடலாக நடராஜர் சுவாமி கவிஞர் ஈழப்பிரியனின் வரிகளில் இன்பா இராதா கிருஷ்ணன்  மற்றும் சாயினி சுரேஸ்குமார் ஆகியோரின் குரலில் இடம்பெற்றுள்ளது. கவிஞரின் கவித்துவமான வரிகளுக்கு எம் இளந்தலைமுறை பாடகர்கள் இனிதாய் குரல் கொடுத்துள்ளார்கள். 

உண்மையில் இந்த இசைப்பேழையில் பாடியிருக்கும் பெரியவர்களைவிட பாடிய சிறார்கள் சிறப்பாக பாடியுள்ளார்கள். பெரியவர்கள் எப்படியோ மொழியை எமது தாயகத்தில் பயின்று வந்தவர்கள். இந்தச் சிறார்களோ இங்கு பிறந்து மொழியை இங்கே பயின்று இவ்வளவு தூரம் உச்சரிப்பு தெளிவாக பாடியிருப்பது பிரமிக்க வைக்கின்றது.

அவர்களுக்கு மீண்டும் ஒருமுறை எனது பாராட்டுக்களையும் வாழ்த்துக்களையும் உரித்தாக்கிக் கொள்கின்றேன். 

எனக்கு இந்த வாய்ப்பை வழங்கிய சைவத் தமிழ்ச் சங்கத்தினருக்கு எனது அன்பையும் நன்றியையும் உரித்தாக்கி விடைபெறுகின்றேன்.

அன்பே சிவம்

படங்களை அனுப்பி வைத்த சுதா அண்ணாவுக்கு நன்றிகள்.

பல வாசகிகள் தங்கள் கைப்பேசிகளில் படமாக்கி உள்பெட்டிகளை நிறைத்திருந்தார்கள். அனைவரது அன்புக்கும் நன்றி.


March 10, 2022

இளவேனில்




 மழலை பாடல் தொகுப்பொன்றுக்காக எழுதப்பட்டது.

இளவேனில்

************

வானம் மெல்ல வெளிக்கின்றது - எம்

மனமும் அதுபோல் சிரிக்கின்றது

பூமி மேனி சிலிர்க்கின்றது

பூக்கள் அங்கே முகிழ்க்கின்றது


பச்சை வர்ணம் தெறிக்கின்றது

பசும்புற் தரைகள் விரிகின்றது

பகலாய் இரவும் ஒளிர்கின்றது

பகலவன் ஆட்சி நடக்கின்றது


எங்கும் பூக்கள் நிறைகின்றது

எந்தன் மனமும் மகிழ்கின்றது

தேனீ பறந்து திரிகின்றது

தேடித் தேனை புசிக்கின்றது


மழலை மனங்கள் நிறைகின்றது

மகிழ்ந்து துள்ளிக் களிக்கின்றது

கவலை எல்லாம் பறக்கின்றது

கதிரின் ஒளிபோல் ஒளிர்கின்றது


இணுவையூர் மயூரன்

#ஈழத்துப்பித்தன்

18.02.2021

March 7, 2022

குடமுழுக்காடும் சிவகாமி

 வரும் மார்ச் 27 (பங்குனி 13) அன்று குடமுழுக்காடவுள்ள இணுவை மண்ணின் சக்தி பீடமாக விளங்கும், சீர் இணுவைத் திருவூரின் சிதம்பரவளவுறை அருள்மிகு சிவகாமி அம்மன் திருக்கோவில்.

 இந்தக் கோவிலிலும் கோவில் வீதியிலும் தேர்முட்டி படிகளிலும் எங்கள் தடங்கள் பதியாத இடங்கள் இல்லை.

இந்திய இராணுவ ஆக்கிரமிப்பு காலத்தில் எமக்கு அடைக்கலம் தந்து காத்த இடம். பல இரவுகள் பாதுகாப்புக்காக ஒட்டு மொத்த கிழக்கு இணுவை மக்களும் இந்த கோவிலின் உட்புறத்திலேயே தங்கி உறங்கினோம். 

இணுவை மக்களின் உணர்வுகளுடன் இரண்டறக் கலந்து "ஆச்சி" என்று அழைக்கப்படும் உறவுமுறைக்கு சொந்தக்காரி.

யாழ்ப்பாண இராட்சியத்தின் 12 பேரூர்களில் ஒன்றாக இணையிலி (இணுவில்) விளங்கிய காலத்தில் மண்ணை ஆண்ட பேராயிரமுடையானால் சிதம்பரத்தில் இருந்து சிவகாமி அம்மையின் சிலை கொண்டு வரப்பட்டு நிறுவப்பட்டது.

சிதம்பரத்துக்கும் இணுவை மண்ணுக்கும் நெருங்கிய தொடர்புகள் உண்டு. கடந்த சில ஆண்டுகளுக்கு முன் நான் சிதம்பரம் சென்றபோது சிதம்பரத்திலுள்ள சைவ சமய பாடசாலையை அமைப்பதற்கு கூரைக்கு தேவையான பனஞ் சிலாகைகளும் தீராந்திகளும் இணுவிலில் இருந்தே சென்றதாக அறிந்தேன்.

பேராயிவன் எடுத்த பெருங்கோவிலை பின் ஆட்சித் தலைவனாக இருந்த காலிங்கராஜன் சிறப்பாய் முன்னெடுத்தான். அவனைத் தொடர்ந்து இணுவை மண்ணை நிர்வகித்த அவனது மகனான இளந்தாரி என அழைக்கப்படும் கைலாயநாதனால் தேரேற்றி உலா வரச் செய்யப்பட்டாள்.

போர்த்துக்கேயர் ஆட்சிக் காலத்தில் எல்லாக் கோவில்களும் போலவே இணுவில் சிவகாமி அம்மன் கோவிலும் இடித்தளிக்கப்பட்டது. சுமார் 150 ஆண்டுகளாக உணர்வுகளூடாக கடத்தப்பட்ட அம்மையின் வழிபாடு பின் வந்த ஒல்லாந்தர் ஆட்சிக்காலத்தின் பிற் பகுதியில் உருவ வழிபாடாக மாற்றம் பெற்றது. 

ஒல்லாந்தர் ஆட்சிக் காலத்தில் தவறான குற்றச்சாட்டொன்றின் பெயரில் இணுவை சின்னத் தம்பி புலவர் சிறையில் அடைக்கப்பட்டபோது சிறையில் இருந்து அம்மனை வழிபட்டு அவள் அருளாலே சிறை மீள, அன்னையின் புகழ் எங்கும் பரந்தது. 

சிறை மீன்ட சின்னத்தம்பி புலவர் சிவகாமி மீது "சிறை நீங்கு பதிகம் பாடினார். அதே போல் இணுவை சிவகாமி அம்மை மீது சிவகாமியம்மை பிள்ளைத்தமிழ், சிவகாமியம்மை துதி, இணுவைச் சிவகாமசுந்தரி பதிகம் என்பனவற்றையும் பாடியுள்ளார். 

இணுவை சிவகாமி அம்மன் திருக்கோவில் வளாகம் சைவத்தை மட்டும் வளர்க்காமல் இயல்,இசை,நாடகம் எனும் முத்தமிழையும் வளர்த்தெடுக்கும் பணியினையும் ஒல்லாந்தர் காலத்தில் இருந்தே மேற்கொண்டு வருகின்றது. 

இங்கு  நவராத்திரி, ஆடிப்பூரம், வருடாந்த பெருந் திருவிழா, திருவெம்பாவை ஆகியன மிகச் சிறப்பாக நடைபெறும்.

நவராத்திரியின் ஒன்பதாம் நாள் நடைபெறும் மகிசாசுரன் போரும் பத்தாம் நாளான விஜயதசமியன்று கிழக்கு இணுவிவில் இருந்து மேற்கு இணுவிலில் அமைந்துள்ள கந்தசுவாமி கோவில  சென்று கந்தசுவாமி கோவில் வளாகத்தில் நடைபெறும் மானம்பூ வாழை வெட்டு நிகழ்வு மிகவும் சிறப்பாக இருக்கும். கிழக்கு, மேற்கு என இணுவை மக்கள் பிரிந்து போகாமல் இருப்பதற்காக பரந்த நோக்கோடு எம் மூதையர்களால்  அன்றே விழாக்கள் இவ்வாறு திட்டமிடப்பட்டன. 

ஆடிப்பூரத் திருவிழா காணக் கண் கோடி வேண்டும்.  பூந் தண்டிகையில் அம்மாளாச்சி உலா வர கோவில் வீதி முழுதும் கற்பூரச் சட்டியின் ஒளியில் மிளிர்ந்து நிற்கும். 

வருடாந்தத் திருவிழா கொடியேற்றத்துடன் ஆரம்பமாகி பங்குனி உத்திர நாளில் தீர்த்த திருவிழாவுடன் நிறைவுபெறும்.

திருவெம்பாவை வேளை சிதம்பரேசனுக்கும் சிவகாம சுந்தரிக்கும் திருவிழா நடைபெற்று அதிகாலையில் தேர்த் திருவிழா நடைபெற்று திருவாதிரையில் தீர்த்த திருவிழாவுடன் நிறைவுபெறும்.

ஆறு ஆண்டுகளாக காத்திருந்த பெருவிழாவான அம்மனின் குடமுழுக்கு விழா நடைபெற அருள் கூடியுள்ளது.

அவள் 

கட்டும் சேலை அழகினிலே

கட்டுண்டு நின்றிருப்பேன்

பட்டுப் போன்ற அவள் வதனம்

பார்த்து (தினம்) பசி மறப்பேன்


#இணுவையூரான்

#ஈழத்துப்பித்தன்

February 11, 2022

ஆச்சியும் அப்புவும்

 


ஆச்சிக்கு எப்பவுமே

அப்பு நினைப்புத்தான்

கொண்டாடி வாழ்ந்த வாழ்வென்று

சொல்லிச் சொல்லி மனுசி குதூகலிக்கும்


பேச்சுக்கு துணைக்கு ஆரன் கிடைச்சால் போதும்

பெரியபுராண படலம் போல சொல்லிச் சிவக்கும்

கண்ணீர்த் துளி மெல்ல வழிந்து

காஞ்ச தோலில் ஈரம் கசியும்


சனிக்கிழமை எண்ணை தேச்சு முழுக வாத்து

சாராயம் கொஞ்சம் குடிக்கத்தந்து  

தலை கோதித் தூங்க வைத்ததும்

நாச்சார் வீட்டில் ஓடி விளையாடிய காலம் பற்றியும்

நாளாந்தம் இரை மீட்டல் நடங்கும்


அப்பு எப்பிடி எணை உன்னைப் பாத்தவர் என்று கேட்டால் 

கதை சூடு பிடிக்கும்

உங்களைப் போலதான் 

உந்த திண்ணையே கதி என்று வந்து இருந்து குந்து உரஞ்சி உரஞ்சியே என்னைப் பாத்தவர்

கண்ணாலை கதை பேசினவர் 

கருந் தேகமும் களையான முகமும் 

அந்த நாளையான் ஆணழகன் 

இப்ப மட்டுமென்ன கிழவன் இருந்தால்

நீங்கள் எல்லாம் கிள்ளுக் கீரையள் என்று

சொல்லும் போதே ஆச்சி முகத்தில

ஆயிரம் சூரிய ஒளித்தெறிப்போடு 

வெக்கம் வந்து கசியும்


கொண்டாடி வாழ்ந்த வாழ்வென்று

கொப்பாட்டப்பிள்ளை கண்ட பிறகும்

ஆச்சி சொல்லி மகிழும் போது 

அப்பு மேல எனக்கும் பொறாமை வந்து போகும்...


#ஈழத்துப்பித்தன்


2003களில் ஊர் போனபோது ஆச்சிமாரோடு பறைஞ்ச பொழுதில் அவை பறைஞ்சதில் இருந்து...

January 25, 2022

நிறைவாக எங்கள் படலையையும் தாண்டினாள்...



இன்று நள்ளிரவு 23.59 (24.01.2022) க்கு கடந்த 8 நாட்களாக எனக்கிருந்த தனிமைப்படுத்தல் நிறைவடைகின்றது. 

கடந்த வாரம் சோதனை செய்ய வேண்டிய தேவை ஏற்பட்டதால் குடும்பமாக சோதனைக்கு உட்படுத்திக்கொண்டோம். எனக்கு Negative என்றும் மனைவி பிள்ளைகளுக்கு Positive என்றும் சோதனை முடிவுகள் வந்து சேர்ந்தது. 

பிள்ளைகளுக்கு அதற்கான அறிகுறிகள் இரண்டு நாட்கள் இருந்து குணமானார்கள். மனைவியை கொஞ்சம் அதிகமாகவே வாட்டி எடுத்துவிட்டது. எனக்கு Negative என முடிவுகள் வந்தபோதும் ஒரு கொரோனா தாக்கத்துக்கு உள்ளானவருக்கு ஏற்படும் அனைத்து அறிகுறிகளும் இருந்தது.  அடித்துப் போட்டது போன்ற உடல் நோ, குனிந்து நிமிர, இருந்து எழும்ப வயிறு மற்றும் நாரிப் பகுதிகளில் கொழுவி இழுத்தது. மூட்டு நோ, கை விரல்களில் உழைவு.

மனைவி பிள்ளைகளுக்கு Positive என்ற முடிவு வந்ததாலும்,  நான் இரண்டாவது தடுப்பூசியை எடுத்து 4 மாதங்களை கடந்து விட்டதாலும் அவர்களை விட ஓரிருநாள் அதிகமாக என்னை தனிமைப்படுத்திக்கொள்ள வேண்டுமென சுகாதார அமைச்சினால் அறிவுறுத்தப்பட்டேன். கடந்த வாரத்தின் நடுப்பகுதியில் மீண்டும் சோதனைக்கு அழைக்கப்பட்டேன் அப்போதும் Negative என்றே முடிவு வந்தது. 

ஒடியல்கூழ், ரசம், புளிக்கஞ்சி போன்ற உணவுகளை எடுத்துக்கொண்டோம். சிறந்த நிவாரணியாக இருந்தது. 

வார இறுதில் உடல் ஓரளவு இயல்புக்குத் திரும்பத் தொடங்கியது.

இப்போ அனைவரும் ஓரளவு இயல்புக்கு திரும்பிவிட்டோம். மனைவிக்கு மட்டும் இன்னும் இடைக்கிடை காய்ச்சல் காய்கின்றது. தொடர்ச்சியான மருத்துவருடான ஆலோசனைகளை பெற்று வருகின்றோம். சிலருக்கு ஓரிரு நாளில் சரியாகிவிடும். சிலருக்கு சில வாரங்கள் கூடச் செல்லுமாம். 


கடந்த 2019 ஒக்டோபர் கம்போடியா சென்று வந்த பின் தொடர்ச்சியான கொரோனாக்காலங்களால் விடுமுறைகள் எதையும் எடுக்கவில்லை. எட்டு நாட்கள் அதிகாலை துயிலெழுப்பி இல்லாத உறக்கம். எம்மை மீட்டெடுக்க இயற்கை வழங்கிய காலம் இது.

October 18, 2021

இணுவையின் பெருவிழா

 

1960களில் எடுக்கப்பட்ட இணுவில் சிவகாமி அம்மன் கோவிலின் மானம்பூ வாழை வெட்டு உலாவின் நிழற்படம் இது.

இணுவில் நடைபெறும்  நடைமுறையிலான வாழை வெட்டு நிகழ்வு இணுவில் தவிர்ந்து வேறு பகுதிகளில் நடைபெறுவதாக நான் அறியவில்லை.

இணுவில் சிவகாமி அம்மனின் மானம்பூத் திருவிழா என்பது இணுவில் கிழக்கு மற்றும் இணுவில் மேற்கு எனும் இருப்பகுதிகளையும் இணைக்கும் பெருவிழாவாகும்.

இயல்பிலேயே இணுவில் கிழக்கு/மேற்கு என நிலவும் பனிப்போரை கருத்தில்கொண்டு அவற்றைக் களையும் முகமாகவே இருபகுதியையும் தொடர்புபடுத்தியே இணுவிலின் கோவில் திருவிழாக்கள் பண்டைய நாட்களில் திட்டமிடப்பட்டன. அவற்றில் பல நடைமுறைச் சிக்கல்களால் கால ஓட்டத்தில் வழக்கொழிந்து போனாலும் இணுவைக் கந்தனின் வேட்டைத் திருவிழா, இணுவை சிவகாமி அம்மனின் மானம்பூத் திருவிழா ஆகியன பண்டைய மரபு மாறாமல் தொடர்கின்றது.

இணுவிலில் உள்ள எல்லாக் கோவில்களிலும் வாழைவெட்டு நடைபெற்று நிறைவடை இருள் சூழும் நேரத்தில் அன்றைய நாளில் தீவெட்டிகள் புடைசூழ இன்று மின்னொளி ஒளி வீச பாயும் குதிரையில் சிவகாமி அம்மன் உலா வரப் புறப்படுவாள். இணுவில் கிழக்கில் இருந்து காங்கேசன்துறை வீதி கடந்து மேற்கு இணுவிலில் அமைந்துள்ள கந்த சுவாமி கோவில் சென்று, அங்கு அங்கு அழகுற அமைக்கப்பட்ட பெரு வாழையை வெட்டிச் சாய்த்த பின் மேற்கு இணுவை மக்களால் வழங்கப்படும் மரியாதையை ஏற்றுக் கொள்வாள். இரவிரவாக கலை நிகழ்வுகளும் சுடச் சுட பால்க்கோப்பியும் பலவிதமான பலகாரங்களில் பகிரலும் என விழா களை கட்டும் அதிகாலை நெருங்கும் வேளையில் அங்கிருந்து அம்பாள் புறப்பட்டு அன்றைய அமெரிக்கன் மிசன் பாடசாலை வீதியூடாக கிழக்கு இணுவிலுக்குள் நுழைந்து கோவிலை வந்தடைவாள். வீதிகள் தோறும் ஒவ்வொரு வீட்டுவாசலிலும் எல்லைமானப் பந்தல் அமைத்து நிறைகுடம் வைத்து அம்மனை வரவேற்று மகிழ்ந்து களிப்பார்கள்.


முதன் முதலாக 1987ம் ஆண்டு இந்திய இராணுவக்காலத்தில் இந்த நடைமுறை நிறுத்தப்பட்டது. பின்னர் தொடர்ச்சியாக நடைபெற்று வந்த விழா கடந்த சில ஆண்டுகளாக சிவகாமி அம்மனின் திருப்பணிகள் நடைபெறுவதால் நடைபெறவில்லை.

June 20, 2021

தன் மீது சுமத்தப்பட்ட வரலாற்றுக்கறையை திமுக துடைத்துக்கொள்ளுமா?

கால நகர்வு புலிகளை வரலாற்றில் இருந்து மறைத்துவிடும் என எதிர்பார்த்தவர்களுக்கு ஏமாற்றமே மிஞ்சியது. இறுதிப்போர் நடைபெற்று புலிகள் அழிக்கப்பட்டு 12 ஆண்டுகள் கடந்துவிட்ட நிலையிலும் புலிகளை வரலாற்று நீக்கம் செய்ய முடியாது தோற்றவர்கள் அடுத்த கட்ட நகர்வுக்கு தயாராகிவிட்டார்கள்.  


மிக உக்கிரமாக தமது புலிநீக்க அரசியல் நகர்வுகளை பல வழிகளிலும் ஆரம்பித்துவிட்டார்கள். அதன் வெளிப்பாடு சம நேரத்தில் பமிலிமான் 2, ஜகமே தந்திரம் திரைப்படங்களாகவும் திமுக அபிமானிகளின் மகிந்தவின் நண்பரனான நொயல் நடேசன், எரிக் சொல்கைம் போன்றவர்களுடான் நேர்காணல்களாயும் வெளிவரத் தொடங்கியுள்ளது. 


இறுதிப் போரில் தமிழினம் அழிய கலைஞர் துணை போனார் எனச் சொல்லப்படுவது சந்தர்ப்பவசமே என இன்றும் கலைஞருக்காக பச்சாதாபப்படும் ஈழத்தமிழர்களின் முகத்தில் கரி பூசும் செயலை திமுகவின் மாநிலத் துணைச் செயலாளர் இசை போன்றோர் கன கச்சிதமாய் செய்து வருகின்றார்கள்.


திமுக தலைமை, ஈழத்தமிழர் நலனே எனது நலன் என மூச்சுக்கு முன்னூறு தடவை சொல்லும் திமுக ஆட்சியில் அங்கம் வகிக்கும் மதிமுகவின் பொதுச் செயலர் வைகோ போன்றோர் இனியும் அமைதி காக்காமல் இந்த வரலாற்று திரிப்பு முயற்சியை தடுத்து நிறுத்த ஆவன செய்ய வேண்டும்.


இன்றைய எரிக் சொல்கைமுடனான விவாதத்தில் கேட்கப்பட்ட கேள்விகள் இவர்களின் மனநிலையைச் சொல்லும்.


இவர்கள் எல்லாம் மனிதர்கள் தானா ??


1. ராஜீவ் காந்தியை விடுதலைப் புலிகள் தான் கொன்றார்களா? 

எரிக் சொல்கைம்: ஆம், ராஜூவ் காந்தியை கொன்றது விடுதலைப் புலிகள் தான். இதை அன்ரன் பாலசிங்கம் என்னிடம் சொல்லியிருக்கிறார். 


2. ராஜூவ் காந்தியைப் போன்று அமைதி பேச்சுவார்த்தையின் தொடக்கத்தில் முக்கிய பங்காற்றிய லக்‌ஷ்மன் கதிர்காமரையும் விடுதலைப் புலிகள் கொலை செய்தார்களே அதைப் பற்றி சொல்ல முடியுமா?


3. பிற தமிழ் போராளி குழுக்களையும் விடுதலைப் புலிகள் படுகொலை செய்தது பற்றிய உங்கள் கருத்து?


4. இறுதிக்கட்டப் போரில் தமிழர்கள் படுகொலை செய்யப்பட்டதற்கு பிரபாகரனின் போர் வெறி தான் காரனமா? 


5. புலிகள் தங்களுக்கான நிதியை எப்படி திரட்டினார்கள்? போதைப் பொருட்கள் கடத்தலில் ஈடுப்பட்டதாக சொல்லப்படுகிறதே?


6. அன்ரன் பாலசிங்கத்தின் பங்களிப்பு இல்லையென்றால் பிரபாகரன் ஒரு போர் நாயகனாகத் தானே விளங்கியிருப்பார்?


7. புலிகள் குழந்தைப் போராளிகளை வலுக்கட்டாயமாக போரில் சேர்ததது பற்றியும், அதன் காரனமாக சர்வதேச சமூகத்தில் தமிழர் பிரச்சனைகள் தொடர்பாக ஏற்பட்ட எதிர்மறைப் போக்கையும் பற்றி விவரிக்க முடியுமா?


8. ராஜூவ் காந்தி படுகொலை மூலம் விடுதலைப் புலிகள் செய்த வரலாற்றுப் பிழையால் என்ன விளைவுகள் உருவானது? (டான் அசோக்)


9. இறுதிக்கட்ட போர் முடிந்த 11 ஆண்டுகள் கழித்தும் விடுதலைப் புலிகளின் வன்முறை போக்கை ஆதரிப்பது ஈழத்தமிழ் குழந்தையிடத்தில் புத்தகத்தை பிடுங்கிக் கொண்டு துப்பாக்கியைக் கொடுப்பது போலாகாதா?


10. ஐரோப்பிய நாடுகளில், வெளிநாடுகளில் சொகுசாக வாழ்க்கை நடத்திக் கொண்டிருக்கும் புலம்பெயர் தமிழர்களால் ஈழத் தமிழர்களுக்கான தீர்வைத் தேடித் தர முடியுமா?


11. பிரபாகரனுக்கு நீங்கள் ஏதும் பரிசு பொருட்களைக் கொடுத்திருக்கிறீர்களா?

அப்படியேதும் கொடுத்ததில்லை என்ற கூறிய எரிக் சோல்ஹேம், அமைதி பேச்சுவார்த்தையில் அவர்களை தொடர்பு கொள்வதற்காக இலங்கை அரசின் ஒப்புதலோடு ரேடியோ ஸ்டேஷன் ஒன்றை வழங்கியதாக கூறினார். அதைக் குறிப்பிட்டு அரக்கர் கும்பலைச் சேர்ந்த ரவிசங்கர்,' புலிகள் அதை பாட்டு கேட்பதற்காக பயன்படுத்தியிருப்பார்கள்' என நக்கலடித்தார். 


12. துப்பாக்கிகளோடும், புலியோடும் புகைப்படங்கள் நிறைய எடுத்திருக்கிறாரே பிரபாகரன் ஒரு நாடக நடிகை மனோபாவம் உடையவரா (Is prabhakaram a drama queen)?


*****


ஒரு இன விடுதலையே அழிக்கப்பட்டு,நாதியற்று நிற்கும் அந்த இனத்தின் மீது இப்படி என்ன வன்மம் இந்த கும்பலுக்கு ???


தன் மீது சுமத்தப்பட்ட வரலாற்றுக்கறையை திமுக துடைத்துக்கொள்ளுமா?


@InuvaijurM